Tibbiyot ta’limida dalillarga asoslangan tibbiyot (EBM) tamoyillarini o‘qitish bo‘lajak shifokorlarning klinik qaror qabul qilish sifati, ilmiy dalillarni tanlash va maqolalarni tanqidiy baholash ko‘nikmalarini shakllantirishda muhim ahamiyatga ega. Mazkur tadqiqotning maqsadi pediatriya fakulteti 5-bosqich talabalarida ilmiy maqolani kritik baholash ko‘nikmalarini rivojlantirishda strukturallashgan EBM-trening samaradorligini baholashdan iborat bo‘ldi. Tadqiqot Farg‘ona jamoat salomatligi tibbiyot institutida 2024–2026-yillarda retrospektiv va prospektiv dizayn asosida olib borildi. Jami 110 nafar talaba tahlilga kiritildi: retrospektiv bosqichda an’anaviy o‘qitish asosida tahsil olgan 52 nafar talabaning natijalari, prospektiv bosqichda esa strukturallashgan EBM-treningdan o‘tgan 58 nafar talabaning oldi va yakuniy ko‘rsatkichlari o‘rganildi. Asosiy yakuniy nuqta sifatida ilmiy maqolani kritik baholash, PICO-savol tuzish, ma’lumotlar bazasida maqsadli qidiruvni amalga oshirish, tadqiqot dizaynini aniqlash, xatolik manbalarini baholash va statistik natijalarni talqin qilish ko‘nikmalaridan iborat integral EBM-kompetensiya indeksi qabul qilindi. Prospektiv guruhda integral ko‘rsatkich 46,8±11,9 balldan 74,6±10,8 ballgacha oshdi (p<0,001). Yetarli kompetensiya darajasiga erishgan talabalar ulushi 27,6% dan 75,9% gacha ko‘tarildi. Retrospektiv guruh yakuniy ko‘rsatkichi bilan solishtirganda prospektiv guruhda barcha asosiy domenlar bo‘yicha ustunlik kuzatildi. Olingan natijalar strukturallashgan, ko‘p komponentli EBM-trening tibbiyot pedagogikasida ilmiy tafakkur, maqolani tanqidiy o‘qish va dalildan amaliy foydalanish ko‘nikmalarini sezilarli yaxshilashini ko‘rsatdi.